14-уми декабри соли равон Сафорати Ҷумҳурии Тоҷикистон дар ҳамкорӣ бо Вазорати фарҳанги Федератсияи Россия ва ширкати “Росконқерт “Шоми фарҳанги Тоҷикистон”-ро дар Хонаи марказии адибони шаҳри Москва, бо шукӯҳу шаҳомати хос баргузор намуд.
Дар “Шоми фарҳанги Тоҷикистон” намояндагони вазорату идораҳо, зиёиён, васоити ахбори омма ва чеҳраҳои шинохтаи Россия, устодон ва донишҷӯёни мактабҳои олии шаҳри Москва, ки ба омӯзиши забони тоҷикӣ машғуланд, ҳамчунин тоҷикони муқими шаҳри Москва ҳузур доштанд.
Чорабинии пуршукӯҳро Сафири Фавқулодда ва Мухтори Ҷумҳурии Тоҷикистон дар Федератсияи Россия Имомуддин Сатторов ва Муовини Вазири фарҳанги Федератсияи Россия Обривалин Сергей ҳусни ифтитоҳ бахшиданд.
Зимни суханронии хеш Сафири Тоҷикистон зикр намуд, ки муносибатҳои фаҳангии Тоҷикистону Россия аз умқи таърих пайваста густариш меёбанд ва чорабинии мазкур аз рағбати ҳарду кишвар барои тақвияти муносибатҳои дӯстӣ, шарокати стратегӣ ва сатҳи баланди боварӣ дар соҳаҳои мухталифи ҳамкории Тоҷикистону Россия шаҳодат медиҳад.
Обривалин Сергей пайғом ва табрикоти самимии Вазири фарҳанги Федератсияи Россия ба самъи ҳозирин расонида, аз сатҳи баланди ҳамкории фарҳангии Тоҷикистону Россия изҳори қаноъатмандӣ намуд.
Бояд тазаккур дод, ки сарфи назар аз сардии ҳаво “Шоми фарҳанги Тоҷикистон” теъдоди зиёди меҳмононро аз тамоми гӯшаю канори шаҳри Москва ҷалб намуда, чорабинӣ дар фазои дӯстӣ ва ҳусни тафоҳум ҷараён гирифт.
Ҳунари волои санъаткорон ба мисли Далер Назаров, Ноҳид Зайналпур, гурӯҳи Шамс, Бобоҷон Амонулло ва дигарон ҳозиринро ба давраҳои заррини рушди илму фарҳанги ғании мардуми куҳанбунёди тоҷик баргардонида, бо савту навои дилнишини аҷдодӣ хотири ҳамагонро болида гардонид. Инчунин намоиши мусаввраҳои рассомони шинохтаи тоҷик ва қироати шеърҳои шоирони классикӣ ва муосири кишварамон бо забоҳои тоҷикӣ ва русӣ ҳусну таровати хосае ба ин шом бахшиданд.

Хадамоти матбуоти Сафорати ҶТ дар ФР