21 сентябри 2017 Сафири Фавқулодда ва Мухтори Ҷумҳурии Тоҷикистон дар Федератсияи Россия Имомуддин Сатторов дар кори семинар доир ба мубориза алайҳи бемории сил, ки дар Сафорати Шоҳигарии Нидерланд дар шаҳри Москва баргузор гардид, ширкат намуд.
Семинари мазкур таҳти сарпарастии Вазорати тандурустии Федератсияи Россия, Вазорати тандурустӣ, амнияти иҷтимоӣ ва варзиши Шоҳигарии Нидерланд, Фонди мубориза алайҳи бемории сил “KNCV”, Созмони умумиҷаҳонии тандурустӣ ва Сафорати Шоҳигарии Нидерланд дар Федератсияи Россия, роҳандозӣ шуд.
Чорабинӣ дар пешопеши Якумин конфронси ҷаҳонии вазирони Созмони умумиҷаҳонии тандурустӣ, ки 16-17 ноябри 2017 дар шаҳри Москва ба нақша гирифта шудааст баргузор гардида, мақсади асосии он мубодилаи таҷрибаи истифодаи роҳҳои иноватсионии мубориза алайҳи ин беморӣ буд.
Дар чорабинии мазкур Намояндагони вазорати тандурустии Федератсияи Россия, Созмони умумиҷаҳонии тандурустӣ, сафирони як қатор кишварҳо, мутахассисони ин соҳа аз созмонҳои байнанлмилалӣ ширкат варзиданда, аз таҷрибаи хеш дар мубориза бо бемории сил, сухан гуфтанд.
Сафири Фавқулодда ва Мухтори Ҷумҳурии Тоҷикистон дар Федератсияи Россия Имомуддин Сатторов низ дар қатори сафирони дигар кишварҳо, аз вазъияти кунунии пешгирӣ ва мубориза бо бемории сил дар қаламрави Тоҷикистон, таҷриба, корҳои дар ин самт ба сомон расонида ва мушкилиҳои ҷойдошта ба ҳозирин маърӯза намуд.
Сафири Тоҷикистон қайд кард, ки дар шароити ҷаҳонишавӣ ва афзоиши ҳама гуна муҳоҷират, кам кишваре метавонад ба танҳоӣ муқобили ин гуна бемориҳои вазнин истодагарӣ намояд. Бино бар ин изҳори умедворӣ гардид, ки созмонҳои байналмилалӣ ва доираҳои мухталифи молию хайриявӣ, минбаъд низ бо Тоҷикистон ҳамкории зичро ба роҳ монда, ба дастовардҳои бештар дар мубориза бо бемории сил дар қаламрави Тоҷикистон, ноил хоҳанд гашт.

Хадамоти матбуоти Сафорати ҶТ дар ФР

 Дастрасӣ ба хадамоти ҳифзи тандурустӣ яке аз омилҳои муҳими созгории иҷтимоии муҳоҷирон дар ҷомеаи қабулкунанда мебошад.

Қоидатан қисми қобили таваҷҷӯҳи муҳоҷирини меҳнатӣ аз Осиёи Марказӣ ин ҷавонон мебошанд. Лекин бо яқ қатор сабабҳо, аз ҷумла сатҳи пасти маълумоти санитарӣ-гигиенӣ, маҳорати гигиенаи шахсӣ ва ҳамчунин шароити бади зиндагӣ дар муҳоҷират хатари гирифторӣ ба бемориҳои ҷамъиятан муҳиме ҳамчун бемории сил ва бемории норасоии масунияти баданро дар байни муҳоҷирон афзоиш медиҳад.

Ин ва дигар масъалаҳо чанд рӯзе пеш дар Москва, дар тренинги омӯзишии “ Тақвияти адвокатии дастгирӣ ва чораандешӣ оиди пешгирии бемории сил дар ҷомеаи муҳоҷирон” баррасӣ шуданд, ки онро Федератсияи Байналмиллалии ҷамъиятҳои Салиби Сурх ва Ҳилоли Аҳмар ва Салиби Сурхи Москва дар чорчӯби оғози фаъолияти фарогир оиди баланд бардоштани сатҳи фаҳмондадиҳии санитарӣ ба муҳоҷирон ва дастрасии онҳо ба муайянкунии пешакӣ, ташхис ва табобати бемории сил ташкил карда буданд.

Мутахассисони шӯъбаҳои Оренбург, Волгоград ва Тамбови Салиби Сурхи Россия бо ҳамроҳии намояндагиҳои Ҷамъияти Ҳилоли Аҳмари Қазоқистон, Қирғизистон ва Тоҷикистон дар муддати ду рӯз усулу равишҳои тавсеаи муассири иттилооти тиббӣ дар миёни муҳоҷирони меҳнатиро коркард намуданд.

Даврон Муҳаммадиев, раиси Намояндагии минтақавии Федератсияи байналмиллалии Ҷамъияти Салиби Сурх ва Ҳилоли Аҳмар дар Россия назароти худро чунин иброз дошт: “ Саломатии муҳоҷирон яке аз авлавиятҳои Салиби Сурх ва Ҳилоли Аҳмар мебошад . Ба касе пӯшида нест, ки мӯҳоҷирон дар Россия дастрасии лозимӣ ба хадамоти тиббӣ надоранд ва қонунгузории Россия ба монанди қонунгузории чандин кишварҳои дигар барои буду боши  шаҳрвандони хориҷии мубтало ба бемориҳое амсоли сил ва норасоии масунияти бадан,  як қатор монеъаҳои ҳуқуқӣ , ҳатто то берун намудан аз кишвар бо мамнӯъ намудани вуруди минаъдаро муқаррар намудааст. Бинобар ин бисёр муҳим аст, ки муҳоҷирони меҳнатие, ки ба Россия меоянд, пешакӣ аз саломатии худ муроқибат кунанд, пеш аз ба Россия омадан сари вақт муоинаи тиббиро гузаранд ва дар муддати буду бош дар Россия ба саломати худ ҷиддан таваҷҷӯҳ намуда, бо пайдоиши аввалин нишонаҳои беморӣ фавран ба духтур муроҷиат кунанд”.

Аз охирҳои июни соли ҷорӣ кормандони Салиби Сурх ва Ҳилоли Аҳмар давраҳои омӯзишӣ ба табақаҳои гуногуни муҳоҷиронро дар шаҳрҳои Оренбург ва Тамбов, дар марказҳои ҳамгароии муҳоҷирон, ки Хадамоти муҳоҷирати Россия кушодааст, дар шаҳрҳои  Москва, Волгоград ва вилояти Москва барои табақаҳои номуташаккили муҳоҷирон, дар маконҳои зисту кори онҳо (дар сохтмонҳо, бозорҳо ва боғҳову боғчаҳо) оғоз мекунанд. Ин фаъолият ҳамчунин муҳоҷирони эҳтимолии ояндаро, ки дар марказҳои омӯзишии Тоҷикистон, Қирғизистон ва Қазоқистон мегузаранд, дар бар мегирад. Ба нақша гирифта шудааст, ки ҳамагӣ то охири соли 2014 на камтар аз 1000 муҳоҷир омӯзонда шавад.  Ғайр аз ин дар ҷараёни омӯзиш муҳоҷирон метавонанд дар таҳқиқоти нигаронидашуда ба омӯхтани сатҳи маълумоти муҳоҷирон дар бораи бемории сил ва норасоии масунияти бадан иштирок намуда, дар бораи роҳҳои ба онҳо маълуми пешгирии ин бемориҳо бигӯянд.

Дар ин фаъолият  мутахассисони Маркази тадқиқоти муҳоҷирати Россия, ки равишшиносии таҳқиқотро коркард намудаанд, ба Салиби Сурх кӯмаки тахассусӣ мерасонанд ва натиҷаи таҳқиқотро эълон мекунанд.

Ин фаъолият бо дастгирии “Мушорикати Лилли оиди мубориза бо бемории сили дар баробари доруҳои гуногун пойдор”, сурат гирифтааст

Манбаъ: Азия Плюс